Knientie Snuffel, Herrie Haos en Iepie Iegelzwien staon bij de Dikke Boom.
An de boom is een groot papier prikt.
Herrie Haos leest: "Kom koekjes eten bij Krakkemikka."
"Jammie! Koekjes! Der op of jongens!" snuft Knientie Snuffel.
"Ik duur niet naor die heks toou!", zeg Iepie Iegelzwien.
"Wees niet zo schieterig!" meeint Harrie Haos, "Snuffel en ik binnen ja bij je!
Gao toch met man." Krakkemikka de heks steeit de dreei vrundties al op te waachten.
"Kom der maor in," krast ze.
Op heur grote ronde taofel steeit een grote schaal vol met koekjes.
Koekies met sukkelao, koekies met rozienties en neuties en koekies met gekleurde hagelslag derop.
"Eet der maar gooud van jongens", zeg heks Krakkemikka.
"Ik gao even hen de w.c. heur."
Snuffel stek tweei koekies tegelieks in zien knienebekkie!
Harrie warkt met zien grote haozetanden binnen tien tellen vief koekies naor binnen! En Iepie?
Die is zo benauwd veur de heks dat hij zien iegelzwienenmondtie niet lös kriegen kan om der een koekie in te stoppen!
En dat is maar gooud, want wat gebeurt er?
Knientie Snuffel gapt ineeinen as een grote en zeg: "Jongens, ik wor mij toch slaoperig!"
"Ik kan de ogen ok zowat niet lös holden."
Harrie Haas hef dit nog niet zegd of hij zakt overzied en slap.
Knientie Snuffel gled over hum hen en slap ok!
"Die rötheks hef slaoppoeier in die koekies daon! Wat ik je brom!" zeg Iepie. "En ik wil weeiten waorom!"
Hij geeit naost Snuffel en Harrie liggen.
"Ahaaa!" Krakkemikka!
Gauw döt Iepje de oogies dicht. Net of e slap! "Ze slaapen alle dreei!" flustert de heks gemeein. "Dat zal mij een lekker soepje worden!"
"Ze wil oous koken!" dèenkt Iepie schrökken.
En wat döt het Iegelzwientie? Met alle stekelties die e hef, prikt e in die lange maogere heksenhanden!
En met zien schaarpe taandties bet e heur! Wel tien keer! Heul stief! Krakkemikka zet het op een schrouwen! "Au!! Au!!"
As Iepie Iegelzwien heur lös lat, rent ze het hoes oet en stöf de bos in! Ze giert zoas allén een kwaoie heks dat kan!
Nao een poosie worden Knientie Snuffel en Harrie Haos weer wakker.
Wat een geluk dat vrundtie Iepie te benauwd was om koekies te eten! Aans was het niet zo gooud aflopen!