Vriendschap
Nao de zomervekaansie giet Quin hen groep 7. Hij hef nog niet zoveule zin, want de vrijheid van de vekaansie bevöl hum aarg goed. Tot zien verbazing zaat er een nei jonggie naost hum in de klasse. Zien naeme is Hasan. Al rap begont ze te kletsen en Quin vrag an hum of hij een mooie vekaansie ehad hef. Hasan vertelt dat hij niet op vekaansie ewest is umdat ze te weinig geld haren. Ze bint namelijk pas evlucht uut een laand waor oorlog is.
Hasan viendt het wel spannend zo'n eerste schoeldag. Hij prat veule mit Quin en is bliede dat hij zo goed naor hum lustert. Umdat hij graeg neie vrienden wil vrag hij an Quin of hij nao schoeltied mit hum wil speulen. Quin zeg: “Ja graeg. Zuw gaon voetballen?” Naost voetballen blik dat ze nog veule aandere dingen saemen wilt doen. En zo greuit der een mooie vriendschap. Ze leert mekaers femilie kennen en leert dus ook over verschillende culturen. Het hiele schoeljaor blieft ze dikke vrienden. Ze bint bliede dat het weer zomervekaansie is.
Dizze zomer giet Hasan ook mit zien femilie op vekaansie. Ze gaot naor een huusie an zee. Hij genottert volop van alle leuke dingen die ze doet. Veural zwömmen in de zee en speulen op het strand viendt Hasan geweldig. Quin giet dizze keer mit de vliegmesiene hen Mallorca. Ze zit in een prachtig hotel mit een groot zwömbad en hiel veule gliebaenen. Het hotel lig drekt an zee, dus ze bint veule op het strand te vienden. Hij mist Hasan wel aarg.
As hij weer in Nederlaand is wil hij graeg mit Hasan speulen en heuren of Hasan ook zo'n leuke vekaansie ehad hef. Drekt op de eerste schoeldag kletst ze even bij over de vekaansie. Alle kiender in de klasse mugt ook heur verhael vertellen. Daorna is het tied um te waarken. Ze begont mit taol. Hasan viendt dat nog aarg moeilijk, maor gelokkig helpt Quin hum. Hasan is aarg bliede dat hij hum zo steunt.
As de schoeldag veurbij is gaot ze saemen speulen. Ze wilt ies wat aans doen as voetballen, dus gaot ze verstoppertie speulen in de speultuun. Ze doet stien, pepier, schere wie as eerst tellen möt. Quin verlös, dus Hasan mag hum gaon verstoppen. Hij hef een hiele goeie plekke evunden aachter een boom. Quin telt: “8...9...10, wie niet weg is wordt gezien, ik kom...!”Jammer veur Hasan dat Quin drekt aachter de boom kik. “Evunden”, zeg Hasan. Ze moet allebeide aarg lachen. Wat hebt ze toch altied een schik mit mekaer. Ze bint bliede dat ze zokke goeie vrienden bint en saemen zo'n leuk leven hebt. Ze hoopt dat de vriendschap nog hiel lange mag duren.
Finn, IKC Margrietschool, groep 8, Smilde
(Vertaoling deur Ans Klok)