Henkie en de clown
Der was ies een klein jonkie dat Henkie heette. Die mus van zien pap en mam, Gerda en Ali, holt oet de bos halen. Henkie leup trots met zien biel naor de bos. Toen kwam Henkie te vallen. Hie kun niet meer hen hoes lopen, dat was te ver.
Toen zag Henkie in de verte een klein hoesie. Hie dacht dat der een aordige, olde man woonde, maor nee! Het was het hoes van een olde circusclown, die gek in de kop was. Henkie wankelde naor het hoesie en hoopte dat der iene was die de deur lös doen zul. Maor der kwam gieniene. Henkie dacht dat e dan wal naor binnen lopen kun. Hie dee het deurtie lös. Het deurtie kraakte.
Der stunden een old taofelie en een old stoeltie. Toen vuul de deur met een knal dicht. Henkie begunde een beetie bang te worden en wol weg. Hie rende naor de deur, maor die zat op slot. De deur gung langzaam lös. Der stun een clown veur de deur. De clown dee de deur weer dicht. Henkie mus zowat schreien, maor hie was twaalf jaor en hie heul zuch daorum nog even stoer.
De clown har rood haor, een rooie neus, een wit gezicht en scharpe tanden. Ok har de clown een rooie ballon vast. Henkie bibberde hielemaol, zo bang was e.
Henkie keek even naor zien biel, dacht even nao. Hie wol slaon, maor hie dee het niet. De clown greep naor zien mes. Hie begunde der zölfs bij te kwielen. Toen heurden de clown en Henkie een wolf hulen. De clown schrök. Hie leut zien mes vallen en pakte Henkie bij zien arm en sleurde hum naor boeten.
Wiederop in de bos stun een klein schuurtie. Daor gung de clown hen met Henkie. Henkie zien bien dee aal zeerder. De clown dee het schuurtie lös en hie gooide Henkie daor hen zunder wat te zeggen en dee het deurtie weer dicht. Dat zat Henkie dan hielemaol allén in het schuurtie zunder wat te eten. Um zuch hen heurd’e alles kraken. Henkie dauwelde gien moment. Hie prebeerde het schuurtie lös te trappen en dat lukte. Henkie rende naor hoes en wol het verhaal oetleggen, maor zien pap en mam geleufden hum niet.
Henkie schreide de hiele nacht, want ooit zul e weerum moeten.
Gerard van der Spoel
CBS De Borgh Börger
(Vertaoling: Jan Germs)