Risselveren

Wat doet de mollegies under de grond.

Ze bint slim an 't risselveren.

Het weerbericht giet er van mond tot mond.

As 't kolder wordt dan mutte wij ’m smeren...

 

As het bar kolder wordt,

dan gaot de mollen dieper naor benee.

Ze kunt niet blieven, ze mut vort;

ze bint het slim oniens, ojee, ojee.

 

Bij vriesweer raokt de mollen reur.

Blieft ze zitten of gaot ze der vandeur?

Ze mut nou eindelijk ies besluten.

De börgemeister krop hen boven, kek naor buten.

 

De zun schient en er lig nog een beetie snei;

maor varder lek het al wal mei.

De locht is helder hemelsblauw.

Verhuzen is een hiel gesjouw.

Al is de wiend een beetie kold en guur,

a'k dat zeg, raokt ze verschrikkelijk oet stuur.

 

De börgemeister nemp het woord. Hij zeg:

Ik kan het veurjaor ruken.

Zul wij opnei gaon underduken?

Dat graoven is een hiele toer,

straks graof wij veur zien mallemoer.

Wij kruupt malkander lekker an,

met hiete koffie uut de kraontieskan.

De mollen begunt met menaar te kieven.

 

De iene helft wil vort, de aandere wil blieven.

Een mollegie met een grieze snoet,

zeg: weej wal daw oes tied verdoet.

De grond is stikstief bevreuren,

van blieven wil ik niksniet heuren.

As 't kolder wordt dan mut wij gaon,

met blieven kun wij niet volstaon.

Een olde mol schrouwt: 't is hier toch warm genog.

Aj ’t slim oniens bint, kriej zulke kribberijen toch.

 

Mörgenvrog opnei vergaodering, zeg de börgemeister.

 

't Gung slim vriezen de volgende nacht.

De börgemeister zeg: dat haar ik wal verwacht.

De mollen kniept heur snoeties stief dicht

en lustert stil naor het weerbericht.

Ze gungen met zien allen diep naor benee.

De mollen bent gelökkig weer veilig op stee.

Het giet verkeerd, dat kunt wij hiervan leren;

aj niet besluut en maor blieft risselveren.

 

Schriever: Beate Plenter

 

De woorden die geel kleurd bint in 't liedtie en het verhaol kuj terugvienden bij de knop "woordenboekie"   op de startpagina van het thema.

Daor ziej de betiekenis en wordt het woord veurelezen.

 

De woorden die geel gekleurd zijn in het liedje en het verhaal kun je terugvinden bij de knop "woordenboekie"  op de startpagina van het thema.

Daar zie je de betekenis en wordt het woord voorgelezen.